便覽小工具簡介

唔好意思，開咗Blog咁耐都唔記得介紹吓版面上幾種小工具有咩用，依家話俾大家知點樣可以容易啲返嚟搵我 =)

1. 瀏覽器左上角有個"追蹤"字眼：如果你都有用blogger，只要選擇追蹤就可以喺你登入時睇到我嘅update.

2. 頁面右欄分享/ 加入書籤：可以即時share你睇緊嘅文章，只需喺選單內揀你想post出嚟嘅地方就ok，或者可以揀星星bookmark咗哩版下次再返嚟睇。

3. Facebook Fans Page： 只要喺右欄個box入面按 "Like/ 讚"，你登入Facebook時就會自動喺你個人主頁上睇到最新update，非常方便。

4. 搜尋文章：想睇番之前嘅文章可以按下月份搵出有興趣嘅題目。

5. Add me on Facebook：加我做朋友只需按一下我張相。

6. Follow me on Twitter：用開Twitter嘅朋友只要follow我亦會睇到即時update。

7. 訂閱：可以直接在Google或Yahoo等個人主頁上加一個box show 即時update 內容，揀"發表文章"就會睇到我寫嘅文章，揀"所有意見" 就會睇到讀者post嘅意見及回覆。

8. 每篇文章最尾都有個"喜歡"格仔，睇完覺得喜歡嘅請按下。

有咁多方便小工具，希望大家多啲返嚟睇啦！

Nail Color 巡禮 #2

會被記黑豬的指甲>.<
全隻搽兩層銀白色甲油，再用黑色帶閃粉尖頭甲油捆邊，手要定唔好震呀。哩支黑色幾好用，夠幼又夠實色，Skin Food 銀底甲油都算均勻，但係好脆好易甩，最多只可以維持一星期。

銀白色
Skin Food Nail Vita #PE808p
from Taiwan
NT$55

閃黑色細筆
pa Slender Brush Nail #slim05
from Japan (Fiona手信)
680円

擊退痘痘作戰計劃

早前連續幾晚唔夠瞓，加上天氣太悶熱，搞到面上出痘痘，好彩常備Body Shop嘅茶樹油旁身，雖然味道有啲難聞，好似阿婆啲藥油，但消炎功效確實唔錯，唔係太嚴重嘅痘痘一般搽一兩日就會自動好番，但如果有強力大痘出沒就冇咁快喇，帶膿嘅痘痘搽完會乾得快啲，一穿咗即刻搽就最好，減低翻發機會。Body Shop另外仲有一款棒狀茶樹油啫喱就唔係幾好用，濃度唔夠高又用得快，用唔夠幾次就冇哂，反而精華油每次只用一滴，一支可以用一兩年，大家唔好買錯！之前仲有用過3M出品嘅痘痘貼，但佢其實只係會吸咗啲面油同痘痘滲出嘅液體，冇乜實際作用。

痘痘好番之後好多時都會留低一粒粒瘀色暗瘡印，就算用遮瘕膏都未必遮得住，試下用L'Oreal嘅White Perfect Zooming Spot Corrector，來身哩隻product係用嚟去斑嘅，但我覺得用佢去暗瘡印效果明顯啲，如果乜都唔搽啲印留喺度兩三個星期都唔退，搽咗嘅話大概一星期就明顯淡哂。




中醫話面上痘痘係身體其他地方出現問題嘅徵狀，以下節錄自上期Cosmopolitan嘅feature，如果你都有暗瘡的話就要留意埋其他地方喇！

額頭：心火盛，血液循環有問題，睡眠不足
眉心：心臟弱
太陽穴：膽囊問題，吃得太油
鼻尖：胃火盛，消化系統異常
鼻翼：卵巢、子宮問題
咀唇四周：吃太多，消化不良，腸胃不適
右顴骨：腸功能紊亂
左顴骨：肝膽功能不良
右面頰：肺熱，傷風咳
左面頰：肝臟排毒不順
下巴：腎功能受損，內分泌失調
下顴：淋巴系統排毒不順，抵抗力差

拒絕做臭女人

相信大家都試過放工逼車時身邊有啲滿頭大汗一身臭味嘅人企喺隔離，想避又避唔到，實在好難頂。不過唔好以為淨係啲大叔先會咁樣，好多斯文靚仔都一樣會，只係自己唔留意，我上次仲遇過一個樣貎娟好打扮入時嘅女仔，濃濃嘅汗水加上濃濃嘅香水，更加令人難受。其實唔一定係有"臭狐"嘅人先有汗味，一般人出汗汗水氧化咗加上細菌滋生，都會變成異味，尤其是香港大熱天時又濕又焗，情況更加嚴重。唔想為咗啲咁少嘅事失禮人，每朝早花10秒鐘時間用止汗產品，都係舉手之勞啫！介紹Rexona幾種產品俾大家。

止汗噴霧用起上嚟最方便，但係就比較快用哂，噴出嚟係粉沫，有香味好快乾，新包裝噴頭上有開關制，連蓋都唔駛開就用得，不過我嫌佢啲"煙霧"太厲害，好容易搞到我哩啲嚴重鼻敏感人士打乞嚏，我通常用嚟噴腳保持乾爽，最適合著密籠鞋又唔想著袜露條邊出嚟咁難睇。之前用過Fa嘅止汗噴霧，效果差唔多。

Rexona Anti-Perspirant Deodorant (Cotton)

$27.90

另一款係滾珠式止汗劑，液體狀要等一陣先乾，只係適合腋下用，但Rexona係我用過咁多牌子中最清爽嘅，之前用Nivea總係有啲濕淋淋感覺，唔係幾舒服，而且Rexona哩隻味比較清淡，唔會點影響香水嘅氣味。唔好睇佢細細支，其實好襟用，一支可以用幾個月。

Rexona Anti-Perspirant Deodorant (Skin Light)

$23.90

Rexona亦有專for男士用嘅噴霧，同女士用嘅差唔多，只係"男人味"好重，噴完已經好似搽咗古龍水。唔想老公變臭男人就買支俾佢啦，尤其經常要外出做嘢嘅就更加唔好懶。

Rexona Men (Body Active)

圖為舊版，最近已換新包裝

順便提提你，止汗劑同香體劑係唔同架，寫明有有效止汗成份嘅先係止汗劑，只有酒精同香味嗰啲香體劑係止唔到汗嘅，只可以當涼涼哋嘅香水用。仲有所有香水都唔可以蓋住汗臭味，大汗的話更加唔好噴香水，兩種味加埋一齊真係唔掂。

Two-Phase Make-Up Remover 大比拼

潮流興用Cleansing Oil 落妝，Two-Phase Make-Up Remover 已經買少見少，好多牌子都唔出，但係我始終唔多鍾意用Cleansing Oil，因為覺得眼妝好難卸，尤其是近睫毛位啲眼線、閃粉同mascara，捽捽吓又會捽入眼，所以一直鍾情用一半油一半水嘅眼部卸妝液，只要用化妝棉輕輕敷住眼睛幾秒再抹走，所有water proof make-up都抹得甩，連睫毛中間啲隙都OK。雖然話係眼部卸妝液，我通常都係用同一支抹哂全塊面，唔分咁多，其實除咗眼妝難落，其他area冇乜難度，因為我唔用防水化妝品，淨係洗面都洗得乾淨。


最初用Two-Phase Make-Up Remover係用Lancome，雖然好好用但後來嫌貴轉用第二啲牌子，用過Kose、L'Oreal、Sephora，感覺都唔差好多，無論賣相同質地都非常接近。今次買咗支Skin Food嚟試下，比較唔同，上層係乳化咗嘅油份，望落好似牛奶咁，亦有好香牛奶味，下層同樣係水狀。正式用時比較容易搖勻，搖完唔會即時分番開兩層，質地較其他牌子油啲，抹起嚟都抹得幾乾淨，但唔似其他牌子就算唔過水都覺得爽，Skin Food抹完之後會有油剩低喺面上，一定要沖水，不過影響唔係太大，因為我每次落完妝跟住都會洗面，整體算OK。

Skin Food Milk Shake Point Make-Up Remover

$135/ 160ml

L'Oreal Gentle Lip and Eye Make-Up Remover
from Mannings
$69.90/ 125ml
(最近好似冇得賣，唔知係斷貨定唔出？)

Sephora Eye Makeup Remover
RMB59/ 50ml
(哩支係上次出trip去北京時，因為唔記得帶而走去買嘅，嗰邊Sephora開到周街都係，個個商場都有一間，買咗細支當旅行裝用，大支好似賣RMB89)






Kose 嗰支留低咗喺大陸屋企，下次先補番張相
from Seibu
$120

Nail Color 巡禮 #1

唔知由幾時開始，屋企有N咁多指甲油，諗番我點解咁鍾意搽指甲，應該要追溯到幼稚園個年代。記得有一年過新年，阿媽唔知係唔係貪玩買咗兩支指甲油俾我扮靚，我搽完覺得好得意，於是就愛上咗佢喇！你話父母對仔女嘅影響係幾咁深遠呢。

既然都買咗咁多指甲油，冇理由唔post出嚟架。我通常每兩個禮拜換一次畫，啲friend見到我嘅反應一般都係話"你啲指甲又唔同咗色喎" ，係呀，次次都唔同色，指甲油已經長駐咗喺我個shopping list入面，只要一見到有鍾意嘅顏色就會買。

今次用咗Canmake紅色透明底閃閃甲油，搽出嚟淡紅色入面有大量粗幼不同嘅銀色閃粉，好bling，先薄薄哋全隻指甲搽一層，待乾後再喺近邊位置厚厚搽多一層，懶得嚟又可以有啲層次，順便遮住指甲條白邊，最後搽多層top coat就完成。哩隻Pretty Girl Top Coat只係一般好用，唔夠glossy又唔係keep得好耐，下次先介紹另一隻正嘢。

Canmake Colorful Nails
from Citysuper
$40


Pretty Girl Quick & Shine Top Coat
from Sasa

冬菇頭也要造型

天氣一日比一日熱，忍唔住要提早剪下啲頭髮，雖然本身都唔係好長，但係黐住條頸真係好難受，於是又去紅磡搵我個御用髮型師Fanny變吓個look。Fanny幫我整頭整咗十幾年(講到好似好老咁...)，得佢最知我心意=) 今次將頸後嘅髮腳全部摌哂，徹底地變成冬菇頭，好舒服。佢次次幫我剪完都話我變番小學一年級個髮型，咁都幾好吖，又後生多幾年。但係話時話，冬菇頭唔gel吓又真係會似小學生嘅，搽番啲造型髮蠟set番少少層次會型啲，可惜香港天氣潮濕，用過幾種wax都唔係好夠挺，之前頭髮再短啲嘅時候還好，一長咗少少就完全立唔起，依家改番個look又轉吓gel頭方法，唔駛再豎起啲頭髮，反而自然啲。Mr. Mo都同時改咗髮型，由上次嘅黃曉明冬菇look變咗今次嘅吳彥祖極短頭，好清爽。以下係我哋用開嘅幾隻hair wax，介紹俾各位參考。

Gatsby Moving Rubber Spiky Edge
幾隻之中最挺，可以豎得起，果然係sell男士髮型，同女仔用嘅product差好遠，但喺上海同北京用時明顯效果勁好多，最主要都係天氣影響，好鍾意佢個packing。

Lucido-L Smash Fixer
明顯係sell女仔，短髮/ 男仔頭都唔啱用，完全唔可以有立體或豎起嘅效果，連佢張廣告相個look都做唔到，只可以將髮尾輕輕扭番少少層次，幾隻之中最弱。

Liese Clear Cube Wax Hard
比Lucido堅少少，短頭髮可以做到立體效果，長啲就只可以做到少少層次，但質感比較輕同爽。

夏日Show Time

夏天又到，背心短裙熱褲又係時候出場，積壓咗喺衣櫃咁耐要重見天日喇！同一時間雙腿都要擺脫legging同長boot出嚟見人，keep fit當然唔少得啦，除此之外都要扮吓靚，以最美一面登場。首先就梗係要清除礙眼嘅毛毛啦，我係Veet嘅忠實fans，用咗好多年，最鍾意用wax strips，一貼一撕就搞掂，又快又乾淨，起初用覺得幾痛，但用用吓慣咗已經冇乜嘢，重點係越用毛毛生得越來越少，而且連啲粒粒都可以黐走埋，依家我用一次起碼可以keep兩三個月。不過wax strips只係適用於腿部，其他細area如手臂等好難黐，又唔就手，我就用脫毛膏代替，但脫毛膏其實只係軟化咗啲毛毛然後刮斷佢，唔係連根拔起，效果唔係好持久。如果皮膚好容易敏感，最好就唔好用以上兩樣嘢喇。

Veet 脫毛Wax Strips及Gel Cream
from Bonjour
$85.80 & $69.90

第二步就係body scrub，每個星期磨一次可以清走死皮同暗粒，尤其是膝頭同手踭位，磨完會白滑好多。我用緊Borghese Salt Scrub，幾鍾意佢種香味，佢啲磨砂粒係海鹽，效果唔錯。買咗好耐，已經唔記得價錢。

皮膚乾但夏天又唔想搽lotion，我揀oil mist，最啱噴手腳，噴完唔會出現蛇皮紋或者白色甩皮咁肉酸，潤膚之餘仲可以有啲"立立令"效果，好似著咗絲襪，又滑又爽。


Olive Oil Dry Oil Mist
from Body Shop
$99





最後再俾啲keep fit tips大家，做帶氧運動減肥好大家都知，如果鍾意做gym，cross training同step兩種機都係唔錯嘅選擇，每次做30-45分鐘就差唔多，但提醒大家做嘅時候腳踭千祈唔好離開塊踏板，健身教練教路提起腳踭用腳尖踩會令小腿變粗，肌肉一舊舊，我以前都冇留意，依家識得就住喇。

男士洗面產品大比拼

相信好多男士都唔多鍾意用護膚品，一來懶，嫌麻煩，二來都唔知嗰啲一支二支嘢用嚟做乜，更加唔明點解老婆/ 女朋友買嚟買去都仲可以有新嘢買，就算用都係老婆買乜就用乜，用完又唔知有咩好。以前Mr. Mo都係咁樣，但經我多年嚟不斷感化，依家已經識得自己揀product用喇，仲識得分邊隻好邊隻唔好，叫我幫佢post出嚟分享吓喎。舊年留守大陸時，喺冇乜好揀嘅情況下買咗一支L'Oreal男士洗面膏，因為有吳彥祖代言又唔係大陸啲雜牌，感覺好啲，用完之後Mo生破天荒第一次讚好用，仲自動自覺日日洗面添。返到香港想買番同一支product，但發現香港同大陸啲品種係唔同嘅，搵咗好多地方都冇，於是就買咗第二啲試用，試嚟試去都係用番L'Oreal，今次用Pure & Matte Exfoliating Gel，佢話洗完後好舒服又冇哂啲粒粒，塊面好爽但係唔會乾。

之前仲用過其他牌子，佢話最差係Neutrogena Men Face Wash，洗完好乾又甩皮，塊面好崩緊，個樽蓋又"吸"唔實入哂水。另外無印良品嘅Face Soap for Delicate Skin由於不含香料，陣味好難聞，洗完又唔係好爽，結果兩支都放棄咗。

其實洗面都好簡單啫，各位男士唔駛咁驚喎，扮靚唔係淨係女人先要架。

戀上香水

想當年第一次正式買香水，係Year 2去法國讀書嘅時候。法國最出名係香水，果然名不虛傳。讀書嘅地方係一個小鎮，downtown有一間香水連鎖店，我估起碼有二千呎，比起香港大間嘅莎莎仲要大，裡面一排排貨架上放滿咗各式各樣唔同牌子嘅香水，由於附近行街嘅地方唔多，有時得閒冇地方去，就會入去嗰間香水店試香水，但係種類實在太多，每次入去試到嗅覺已經麻木咗都未試得哂。左揀右揀，最終都係鍾意Lancome O Oui!，當時係新出品，周圍都見到佢嘅廣告，時至今日仍然係我的最愛，可惜已經絕咗版，後來托表妹喺美國幫我買，包裝換咗，香味都有少少差別，估計唔係正廠出品。

自去完法國返嚟，可謂戀上咗香水，尤其喜歡清甜水果味，買完一支又一支。近期最愛係DKNY Be Delicious 青蘋果味，其實幾年前佢一出時已經好鍾意，不過礙於已經買咗好多又未用哂，一直都冇將佢加入收藏之列，直至上次去台灣旅行，臨走喺機場免稅店俾我見到有Special Travel Edition，一set入面有香水、lotion同shower gel，仲送多個shopping bag，只係NTD$2180(約HKD428)，好抵，結果都忍唔住買咗，順便當用埋剩餘嘅台幣=P





以下係我嘅(曾經)收藏品，睇吓有冇你都鍾意嘅？

Lancome O Oui! 果香味 (改版後)

Lancome Aroma Fit 橙味 (已絕版)

Lancome Aroma Source (已絕版)

Tommy Girl 啤梨味

Benetton Unisex 青蘋果味

Issey Miyake L'Eau D'Issey D'Ete Souffle 某年夏天限定版

Moschino Cheap and Chic 橙味

Paul Smith Rose

Salvatore Ferragamo Eau de Toilette









唔寫一次出嚟都唔知原來自己用過咁多香水‧‧‧

精靈大眼仔第二話

上回整完眼睫毛仲係嫌眼仔唔夠大，於是決心試戴大眼con，雖然已經想咗好耐，但係一直冇行動，最主要係怕戴得唔舒服，直到上星期終於買咗1-Day Acuvue Define嚟試。平時都有用開1-Day Acuvue Moist，覺得好舒服，戴成日都唔覺有戴con，估計佢嘅大眼con應該唔會太差，加上睇完產品介紹都有啲信心。我買嘅係啡色，細心睇會發現佢嘅顏色圏外圍刻意做咗少少irregular效果，唔係圓碌碌咁假，戴上眼算幾自然，顏色同我本身眼珠顏色幾接近，不過略嫌內圏細咗啲，偶然"跣低"咗少少就會"望到"顏色圏啲紋，戴住出街冇乜問題，但如果要長時間睇書或者睇近嘢就會有啲濛濛哋，整體尚算舒適，戴足一日都唔乾。

如果有興趣試戴color con或者大眼con，建議你去眼鏡舖驗完眼先買，唔好貪平少少上網訂或者去格仔店買，因為color con唔似普通con有咁多弧度揀，最好搵視光師check吓啱唔啱，以免戴得唔舒服甚至影響視力，咁就唔抵啦。如果唔係成日戴的話用每日即棄型會抵啲同方便啲。

下回挑戰終極公仔大眼睛Look，由於架撐甚多準備需時，請密切留意更新！

Johnson 1-Day Acuvue Define 動人啡
$240/ 30pcs

打破新鞋的宿命

又到換季嘅時候，一堆新鞋已經等住我著喇！夏天梗係要買番幾對涼鞋同高踭鞋襯衫啦，無奈次次著新鞋總會腳痛、刮損腳、起水泡，好似宿命一樣，鞋同腳總唔可以安安樂樂一齊生活，個人又跌watt，行街都冇哂心機。為咗唔好讓悲劇再次發生，著鞋之前唯有做多啲安全措施，於是即刻去櫃筒底搵番個好幫手出嚟！

哩卷係N咁耐之前Kathy俾我嘅醫用透明膠紙，哩個方法都係佢教我嘅，由於換一對新鞋都只係頭一兩次著先要用到佢，所以用嚟用去都未用完（即係話我都唔係買咗好多鞋啫），要買的話屈臣氏有3M Nexcare Clear Tape 1"闊，$29.90，可以cut開一半用1/2"闊都夠。只要貼喺腳上危險部位如腳踭同腳趾，就可以大大減低刮損的機會，而且因為係透明嘅關係，就算露出嚟都唔係好覺眼，唔會好似貼膠布咁肉酸。另外，爽健有專貼鞋內腳踭位嘅透明啫喱貼都可以幫到手，不過就厚咗少少，如果對鞋已經好窄就唔係好啱用。仲有，著鞋前可以先喺鞋裡面搽一層爽身粉，咁會著得舒服啲同埋冇咁容易起水泡。















如果真係唔好彩刮損咗腳，經我多年貼膠布嘅經驗，我強列推薦用Johnson Tough-Strips，其他款式一概唔掂，唔駛哂錢試喇，得哩隻夠大塊夠厚夠彈性，又黏得實唔會捲埋一"住"，貼咗可以keep兩日，沖涼都唔甩，用埋滴露藥膏就仲好啦。

精靈大眼仔LOOK

平時返工或者出街我都唔多化妝，但係雙眼做少少手腳的確會精靈好多，成個人都精神哂。剛剛過新年的時候，買了一個新睫毛夾，非常好用，當時已經想介紹朋友買，依家喺哩度慢慢講你哋知。這款新出品來自日本，賣點係按照東方女仔面型設計，眼窩沒有外國女仔那麼深，而且弧度亦經過改良，可以造出細緻的捲曲效果。雖然價錢有啲貴，但我覺得個Design好有Heart，所以仍然買下一個。試用後發覺效果真係好靚，以前用普通睫毛夾經常出現唔均勻情況，有時唔覺意大力少少就會將睫毛變成直角L形或者垂直向上，搞極都搞唔返，用新夾就完全冇哂哩啲問題，夾出來好貼好自然，仲會有少少扇形散開的效果，唯一美中不足就係眼角頭尾位置有少少不到位，想Perfect就要用第二個細夾補飛，不過嫌麻煩就咁單用都好OK，值得推介。

KOJI Curving Eyelash Curler
from CitySuper
$125

買完睫毛夾當然要買埋Mascara啦，同一時間揀咗一支。哩款Mascara質地屬於管狀纖維，搽上乾咗之後會好似套咗一層外套喺睫毛上面，造出纖長效果，一條一條好分明，唔會一舊舊又唔會化開。

Dejavu Fiberwig Mascara
from CitySuper
$108

不過，我都係比較鍾意濃密效果多啲，於是又買咗另一個牌子試下。今次效果非常滿意，夠濃夠密又容易搽，一排排扇形散開好似貼咗假睫毛咁，唔錯，多謝ColourMix化妝姐姐介紹。

Ecorre Volume & Curling Mascara
from ColourMix
$120