歡迎加入我的扮靚Blog,請到Facebook接收更新,同埋多多入嚟留言 =)

2012年11月30日星期五

告別扁撻撻頭髮

早排成日去做gym,做完一定喺嗰度沖完涼、洗完頭先走,每次去親都要拎衫褲鞋襪一大袋,為咗唔想加重負擔,一直都係用gym提供嘅洗頭水、沐浴露,可能之前頭髮超短覺得冇乜所謂,但越用越發覺唔掂,洗頭水洗完之後頭髮嚡圾圾,又乾又旱,用埋護髮素係潤番啲,但係第二日個頭必定會立黐黐兼扁撻撻,無論點gel都搞唔掂 /_\ ,而且啲髮質差咗好多,頭髮一長番少少就現哂形,再係咁落去肯定死梗。

最近轉用咗Fanitsu嘅新洗頭水同護髮素,用完覺得好清爽同好滑,而且頭髮有番彈性,有種好鬆軟嘅感覺,唔會撻哂落嚟一pat嘢咁,朝早起身好容易就gel得靚個髮型,之前用Dove都係一般般。

接受唔到自己個頭咁肉酸,最終都係屈服,自備旅行裝洗白白用品,搵兩個細樽裝番啲私伙洗頭水、護髮素帶埋去做gym。



Fanitsu 活髮修護洗髮露 及 防脫髮修護護髮素
@$110 from 愛美麗網

2012年11月25日星期日

陶瓷娃娃曲髮

以前長頭髮嗰陣成日都電髮,但每次都係用傳統髮芯+電髮水的方法電,剪短咗頭髮幾年冇再電過,直到今年又想改吓造型留番長,7月時電過一次,都係做傳統電法,到依家頭髮長咗幾吋,雖然仲係好鬈,但成個型已經走晒樣,於是今日又去搵我御用髮型師Fanny搞搞新意思,試吓做陶瓷曲髮,出嚟效果真係同以前唔同,係靚好多喎!

傳統電髮係先用髮芯卷好頭髮,再唧藥水,再用機焗頭加熱,對於我哩啲頭髮咁厚嘅人嚟講會出現一個問題,因為髮尾卷咗喺入面,藥水滲唔到又唔夠熱,好容易搞到上面鬈得滯但髮尾唔夠鬈,而且出嚟啲鬈紋好實,好似我以前電爆炸頭嗰仲髮型就好啱,不過家陣潮流已經唔同晒,愛靚就要追上時尚。

成頭接滿電線,有啲似做科學實驗
陶瓷電髮做法剛剛相反,先搽藥膏再卷陶瓷髮芯,跟住每個髮芯接上電線後會發熱,所以整個頭受熱均勻好多,又唔驚啲藥水滴到周圍都係,而且因為啲芯會熱每一個的size可以比傳統嘅大好多,中號用十幾個芯已經夠卷晒成個頭,電20分鐘就搞掂,我洗剪電兩個鐘就完事真係史無前例咁快!今次由大師親自出手,效果梗係比Junior做靚好多啦!電完出嚟頭髮輕身有彈性,明顯均勻同有volume好多,可以鬆開唔會硬梆梆一條條,感覺好自然又有層次,有啲日本娃娃小可愛feel唔會似師奶,唔怪之得日本咁興啦!


拆咗髮芯之後頭髮好似卜卜脆蛋卷



2012年9月30日星期日

甩皮記

曾幾何時日本去死皮足膜hit極一時,一路想試但覺得百幾蚊整一次唔係好值,所以從來冇用過。今年夏天日日著涼鞋,搞到對腳又粗又嚡,自己都有啲頂唔順。雖然個個星期都有用火山石磨皮,但效果都係麻麻哋,磨完一兩日又打回原狀。上星期去韓國見到Nature Republic有得賣,見平平哋買咗嚟試,返酒店即刻用,又唔錯喎,值得推介!

襪狀foot mask,包裝上有中英文說明,唔怕唔識用。袋裡面裝住好多精華,著住雖然冇嘢封口但都唔甩,一個鐘頭後沖水就得喇。頭兩日一啲反應都冇,但第三晚就開始成塊皮甩出嚟,不過死皮厚的位置就未開始甩,可輕輕搣走甩咗嘅皮,一啲都唔痛,其實冇咩感覺。到第六晚就全部甩晒喇,對腳變番滑嘟嘟,實在太開心!

如果有sis有興趣,可留言代購,每對HK$68。

2012年8月8日星期三

波點型藍指甲

計計吓起碼一年冇買過指甲油,屋企啲指甲油永遠都唔會用得晒,感覺好嘥,上星期執嘢掉咗好多支陳年已經乾晒嘅甲油,又癮起想買過啲新嘅顏色:P。路過莎莎見到門口一大堆佢自己品牌嘅mini甲油,顏色好多,貪得意揀咗幾隻色,反正超平,$15兩支,就算唔好用都冇乜所謂。

首先試咗支藍色,搽上手睇起嚟帶點綠色,都幾型仔。質地感覺唔錯,好容易搽,顏色均勻,可能深色關係搽一層已經夠晒色,光澤度好夠,但嗰晚太眼瞓未加工就去咗瞓覺,第二日經過一日之後發覺開始花,證明唔係好硬淨。第二晚再用珍珠白色畫波點,照舊用牙簽頭點上去就完事,但因哩支顏色比較淡,要滴好厚上去先現到色,等好耐先乾,但有點珍珠粒粒嘅效果都唔錯。又等唔切去瞓覺,瞓醒再搽面油,再一次假扮gel甲成功。

2012年8月2日星期四

以真亂假大眼娃娃睫毛膏

近期大愛的超級無敵大眼娃娃look,已經encore第二支喇! 日頭返工咩都唔搽淨係夾睫毛搽mascara已經成個人精神晒,家姐話齋眼仔轆轆見客同人講嘢佢會自然望住你對眼,有心機聽好多,唔駛刻意放電都會吸引到對方,所以係出門必備裝備。

Sasa自家品牌sasatinnie,聲稱Made in Italy,質地很好,最like佢嘅梳形擦頭,可以梳到眼睫毛一條條好分明,唔會一舊舊,而且佢有超強定型力,朝早夾鬈睫毛搽咗佢可以keep到夜晚都唔dup番落嚟,實在難得。用咗佢效果好似貼咗假睫毛一樣,但真睫毛點都自然得多,唔化妝都唔覺得怪相。But由於佢超防水,試過用唔同落妝油都唔係抹得好乾淨,始終都係要用Lancome Bi-ficil先搞得掂。






2012年7月9日星期一

糖果風珍珠法式甲

隔咗咁耐冇post過指甲,唔係我冇幫手指扮靚,其實說來話長…話說今年過年前我陪朋友上深圳整Gel甲,貪得意又整埋一份,自問我啲真甲好靚,從來冇整過Gel,不過見臨過新年即管試一次啦!嗰次都整得好靚,我都好滿意,but過咗個幾月之後就開始後悔。由於師傅整得太好的關係,我自己點都拆唔甩,唯有又去舖頭整過,哩次去咗旺角整,老實講真係麻麻哋,幾個禮拜已經開始又崩又甩。但我唔想再整,情願留番好啲真甲,於是就渡過咗幾個月又崩又斷又花嘅肉酸時期。經過我好努力修甲之後,終於可以用番真面目見人喇! ^^~

難得指甲變番靚靚,今次就暫時放棄平日的型格路線,搞搞清甜小可愛look。傳統法式甲creamy粉紅底白邊實在太女人,唔多啱我,來個變奏用珍珠底半透明甲油來做,帶點閃粉冇咁悶,效果低調得嚟又夠sweet。




1. MISSHA [PK08]
2. SKIN FOOD [PE808P]
3. MISSHA [SHINE TOP COAT]