歡迎加入我的扮靚Blog,請到Facebook接收更新,同埋多多入嚟留言 =)

2013年8月6日星期二

蚊釘急救有辦法!

Zaza尋晚被惡蚊釘咗一大啖,著住長褲都照針可也,腿上一大粒蚊眼又痕又紅又腫,好難受!以前會搽無x膏或者紫x油,但通常連搽幾日都冇乜減退跡象,而且止痕只維持一陣子,好快又痕過。今次屋企有咗歐薄荷精油,即刻將香薰治療課學以至用,搽上一滴,感覺清涼好快就唔再痕,今朝起身蚊眼已經退了大半,而且全日一啲都冇痕,夜晚返到屋企再睇,成粒蚊眼已經唔見咗,真係超好!以後就算再被蚊針都唔怕對腳一撻二撻咁肉酸 =)

未搽油前


12小時後


24小時後
使用方法:

成人─ 如果範圍不大,可直接使用一至兩滴歐薄荷精油塗搽患處。如範圍較大,或皮膚容易敏感,可用5ml植物底油(可選葡萄籽油或葵花籽油等較薄身的油),或5g蘆薈啫喱,加入1滴歐薄荷精油稀釋後塗搽。

小童─ 可用5ml植物底油,或5g蘆薈啫喱,加入1滴歐薄荷精油稀釋後塗搽。

幼兒─ 可用10ml植物底油,或10g蘆薈啫喱,加入1滴歐薄荷精油稀釋後塗搽。


注意:精油的濃度非常高,不宜過量使用,未經稀釋的精油最多只可塗一至兩滴(這個份量效果已經很好),小朋友必須稀釋後使用!

純天然的歐薄荷精油除咗可以搽蚊咬外,對皮膚敏感或濕疹引起的痕癢都有好好止痕作用,亦可幫助退燒,舒緩傷風咳嗽鼻塞流鼻水,止嘔止瀉,幫助振奮精神,增加專注力,同埋適合油性頭髮和暗瘡皮膚使用。Zaza下次再分享其他用法,亦歡迎各位找我 =)


如果有興趣購買,可到 https://www.facebook.com/PhytoSpa

2013年6月19日星期三

香薰按摩的神奇功效

Zaza由細到大最鍾意啲香噴噴嘅嘢,香水同一時間起碼有五六枝,唔同心情場合就會噴唔同香味。以前成日去泰國每次都一定會去做spa,做完香噴噴滑嘟嘟,仲會買一大堆香薰同乾花返香港。香薰可以令人relax相信大家都知,原來除此之外仲有好多唔同功效,屬於天然療法的一種,外國已經做過好多research證明對不同身體和情緒問題有明顯幫助,自從Zaza讀咗香薰治療師課程之後就親身體驗到有幾神奇!

話說半年前有位客戶想Zaza幫忙訂造一批香薰按摩油,於是Zaza就由法國香薰廠訂咗精油,之後Zaza一直不以為意,留咗啲sample喺公司就唔記得咗哩件事,直到上個月Zaza讀課程時先至記得搵番啲sample出嚟試吓。原本客人係用嚟做減肥同通淋巴,Zaza就梗係唔執輸諗住用嚟減吓肚仔啦!用咗之後,發覺唔止減肥咁簡單,其他平時冇乜留意嘅問題竟然意外地改善!

Zaza試嘅按摩油裡面配方咗純天然西柚、杜松果、茴香同天竺葵香薰精油,幾種精油都對去水消脂好有效,混合後香氣甜美,淨係氣味Zaza已經非常like!由於Zaza重點想減肚,於是只係每晚用按摩油按腰肚。Zaza胸前兩邊鎖骨對落位置原本有啲酸酸痛痛,有少少似肌肉痠痛嘅感覺,未至於好唔舒服,從來冇諗過理佢,但按摩幾日後發現原本的痛感忽然間冇咗,諗諗吓就記得以前有按摩師講過嗰啲位係淋巴位,如果痛就代表塞淋巴,Zaza就明白其實嗰啲唔係整親肌肉,而係因為循環不良引起,而Zaza用嗰幾種香薰油都有改善淋巴循環功效,自然可以令淋巴唔再痛。Zaza本身冇乜水腫問題,如果唔係哩啲小痛可能唔會體驗到香薰對淋巴的作用。

另外一個意外收獲,Zaza平時有啲經前綜合症,雖然唔算好嚴重,但M前都會有少少肚脹、頭痛、情緒低落、超攰、冇精神,頭一兩日仲會肚痛、肚痾、煩燥,而且特別容易傷風感冒,但喺從來冇諗過哩啲問題有得救嘅情況下,用咗香薰油幾個星期,今次竟然一啲唔舒服感覺都冇出現過!感覺神奇之際Zaza亦都即刻睇書,發現原來哩幾種香薰對調理經期不適都好有用,真係一舉多得!

講番最初目的:減肥!其實Zaza嘅身型體重都算標準 (不過女仔永遠都覺得要再瘦啲 :P) ,但脂肪比例就過高,所以Zaza嘅減肥目標係減少脂肪增加肌肉,要達成任務首先一定要增強新陳代謝,跟住一定要做負重運動鍛鍊肌肉,再減少脂肪。近幾個月Zaza忙到飛起好少時間做運動,亦冇改變平時飲食生活習慣,每隔幾個月會喺做gym時check吓in-body肌肉脂肪比例,前幾日check到相比幾個月前減咗3kg脂肪,增加咗2kg肌肉,最近一個月只做得一兩次運動都算有啲成績。用香薰油用咗3個星期,本來應該要日日搽,但有時Zaza只係兩三日先搽一次,小腹減咗半寸,都算唔錯了!

最近開始為朋友調配香薰產品,除咗香薰爐用的純精油、按摩油外,其實香薰仲可以用嚟做護膚品、香水、頭髮護理、治療皮膚問題、肌肉關節痛、減輕壓力等等好多好多功效,Zaza會逐一同大家介紹,如果各位有啲身體小問題想試吓用香薰幫手,歡迎找Zaza!

2013年5月15日星期三

告白篇-Zaza的重新自我介紹:讓美麗成為事業,令人生更為美麗

Zaza從來好少提及自己的工作,大部份朋友不論新相識還是舊相好,其實都唔係好知道Zaza做緊乜,今次Zaza覺得應該向大家表白下,講講自己的身世。可能都係因為個人貪靚,我的工作都同靚有好大關係。

認識Zaza時間較長的朋友,印象中都覺得Zaza係做設計,其實只係啱咗一半。說來話長,要由遠古時代講起。話說Zaza的屋企人三十幾年前(即係Zaza都未出世嗰陣)已經開始做護膚品和個人護理用品的生意,在香港有自家廠房生產洗護用品,亦有入口歐洲各地的原材料同護膚品,是香港的老行專,但向來非常低調,只有行內人仕會找到他們。Zaza自小就在這個家庭長大,客人都講笑說Zaza係用護膚品浸大的。

入大學的時候,Zaza原本想讀有關研究護膚品的科目,但香港跟本就冇得讀,化學科其實大部份都唔係好關事,於是Zaza就揀咗心儀的中文大學,主修營養學,副修法文,讀法文其中一個原因,係想第日去法國做調香師(即係做香水配味嗰個師傅)。在大學風流快活的日子,Zaza參加咗話劇劇社,唔知算唔算無師自通,Zaza做咗劇社御用舞台化妝師兼形象設計,仲開班授徒,亦有客串幫其他團體化妝,直到依家間中都會幫人化吓妝扮吓靚,但都只係玩味性質,並非專業。除咗讀"正職"嗰份書外,Zaza最大興趣就係設計,於是亦part time讀平面設計,又part time做freelance的設計工作。

就係咁,畢業之後Zaza就搵到第一份工,做design & marketing,一年後就決定創業,開咗第一間design studio。當時大部份的客人都係屋企護膚品生意啲客人,幫佢哋設計包裝、廣告、陳列等,慢慢越做越廣泛,成為咗branding & marketing 顧問,客戶變成各行各業乜都有,簡單嚟講就係一條龍咩都做晒啦!而且同時亦都慢慢pick up埋屋企啲生意,又搞咗個自己的設計生活品牌,都好多姿多彩架!

直到舊年,Zaza已經冇再參與之前的設計公司,全權接手晒屋企的生意,亦建立咗十幾個自己品牌的護膚產品,部份係入口,部份係自己公司生產,全部產品都係經由Zaza親自精心挑選先會納入旗下!現在全力做自已品牌的工作,所有設計、推廣項目都由Zaza親自策劃監督!舊年年底亦開咗網上消費平台“愛美麗美容健康熱賣網”,搜羅世界各地的產品出售。其實依家Zaza做緊嘅工作,就係將過去咁多年的不同工作集合大成!

講完古,點都要講埋未來大計!Zaza依家讀緊英國IFA認可整全香薰治療師課程,到年底就會正式成為香薰治療師,除咗靚之餘健康亦係非常重要,冇咗健康個人一定唔會靚得去邊,Zaza讀哩個課程就係希望將健康與美麗同時帶俾我身邊的人!Zaza好快就會開youtube channel同大家分享製作DIY護膚品的方法,到時希望大家多多支持啦!

最後一提,Zaza的扮靚blog烹飪blog都係純粹個人分享,所以大家睇嘅時候唔會見到blogger試用文,Zaza亦唔鍾意喺自己個blog賣自己啲廣告,或者幫人哋賣廣告,絕對係實話實說。如果大家睇完Zaza的告白後願意支持我的工作,就請大家多多參與愛美麗的活動,同埋分享俾你的朋友啦!

愛美麗美容健康熱賣網 - www.imbeauty.com.hk
愛美麗Facebook專頁- https://www.facebook.com/imbeautyhk

2013年4月29日星期一

甜美春日新妝 趕走沉沉晦氣

在這個乍暖還寒的季節,新衫新鞋已經紛紛出場,妝容又點可以唔換季?冬天嘅煙薰色可以暫時講ByeBye,搵番甜美可人嘅粉色系出嚟襯番今季春裝啦!Zaza今季入手咗好多淡粉紅色嘅新衫,今次嘅彩妝一於用粉紅色調化個清清哋嘅Sweetie Look!

工具全家福


第一步就梗係打好個底先啦!Origins VitaZing BB Cream 質地唔錯,夠薄夠貼,而且唔易令皮膚出油,顏色都好自然,唧喺手背再用手指搽上面輕輕推開就已經好均勻。
單用BB Cream 遮瑕效果唔多夠,Zaza最鍾意用Chantecaille Stick Foundation當遮瑕膏,搽在面上嘅粒粒同痘印, 再用指尖點勻就搞掂。

對於極為嚴重嘅黑眼圏,就要出動Chantecaille Total Concealer,前文已經提過唔多講了。

跟住就到眉喇,雖然本身眼眉都已經修得好靚,但搽咗粉始終都會令眉變淡,輕輕掃少少眉粉就可以立體番晒! 睇吓左右兩邊的分別就知啦!

想成個輪廓更鮮明,就要打鼻影喇!由眉頭開始順鼻樑兩側掃到落鼻翼,畫一個三角型就可以了。如果唔係要打燈影相淡淡一層就已經足夠。

打完暗位就要打光位,鼻樑正中由眉心到鼻尖,加埋眼眉對落眉骨位掃上米白色光影就更凸出了。今次用埋用同一隻色眼影搽埋眼頭同下眼線位,MAC Vanilla色略帶閃粉的Eye Shadow 可一次過做晒。

跟住就係成個彩妝最重點的眼影了,今次用咗Zaza大愛嘅Scarlett Glamo-Glitz Midge粉紅色閃粉,多年前購自Joyce Beauty,質量真的非常好,幼細易上粉兼有好特別嘅顏色,粉紅色Eye Shadow一向俾人好難carry嘅感覺,但哩隻金屬色卻令人一試鍾情。掃在雙眼皮位再稍為向上blend開,自然得嚟唔會太誇張。 (燈光問題影相唔係大明顯,下次出街影過張靚啲嘅補番)


又到例牌必做項目,夾髦睫毛後搽上Mascara,即時成個醒神晒!Sasatinnie Super Dolly Mascara確係好好用,已經encore咗兩枝了,梳型刷頭比掃型更細緻。今次都係以清淡為主,所以唔貼假毛毛了。

為咗眼仔更圓更大更精靈,用眼線Gel畫上內眼線,從中間畫起,左手要輕輕按住上眼皮反開睫毛內側的白色邊邊先畫得靚,畫到邊反到邊,中間最粗要填滿整條眼線,近眼頭及眼尾位置收幼變成尖尖的會比較自然。
新買的日本Modereal眼線Gel效果唔錯,容易控制,但略嫌送的掃掃毛太硬,畫到眼頭感覺好吉眼,防油力差啲啲,過咗半日會輕微化到下眼線,但唔算嚴重可以接受。


眼仔完成了,加埋胭脂同lip gloss 就大功告成!今次用咗Borghese Mineral Matte Blush Hush Pink,質地唔錯容易上粉,顏色也自然。近日大熱嘅Dior Addict Ultra-Gloss其實Zaza已經用咗兩年,冇改錯名真係會令人Addicted!唔係幫佢賣廣告,質地絲一樣咁滑,一啲都唔笠,而且超級glossy閃令令,顏色又靚,都係大愛之選!
Zaza目標下次再post化妝文時可以拍埋片一齊出啦,始終影埋過程出嚟比淨係文字同圖片好好多!希望大家多多支持啦 =)



2013年1月6日星期日

熊貓眼變電眼專業Concealer


我一向都係熊貓啲friend,眼精華都幫唔到我同熊貓眼講byebye,所以我平時一定有出門三寶:concealer, mascara & lip gloss。唔駛見人嘅日子通常都唔化妝,淨係搽哩三樣嘢就得喇。今次介紹哩隻concealer已經跟咗我七八年,始終覺得佢最好用。哩個意大利牌子Chantecaille一路都喺Joyce Beauty度賣,最初連廣告都冇出,係我一個做PR的朋友同我講Joyce Beauty有隻粉底好正好多明星用,叫我得閒去睇吓,我特登走去又一城先識得佢。唔經唔覺用咗咁多年,但一盒其實好襟用,可以用年幾兩年,貴買平用。

試過好多唔同牌子的concealer,Lancome liquid concealer太薄遮唔到黑眼圈,Bobbi Brown隻cream concealer又太厚好唔自然兼現晒眼紋,但哩隻就啱啱好,又貼又唔乾,齋搽唔化妝都好自然,薄薄哋搽雖然唔係100%遮到晒黑眼圈,但都幾ok,搽埋粉底其實效果就好好。Cream狀質地好幼細,用支細掃輕輕就可推開,再用手指點勻已經搞掂。有好多顏色選擇,遮黑眼圏用比自己深一度嘅顏色比較適合,Sales的服務都好好,可以慢慢試到啱先買,最近沙田新城市廣場開咗分店,又方便啲。

哩篇文其實好耐之前已經想出,無奈一路都影唔到一張比較見得人嘅相,今次用咗部新手機影總算可以出得街 =P




Chantecaille Total Concealer
Color: [Cream]
$380 from Joyce Beauty

電髮後救星水療髮膜

用髮膜後,冇吹冇gel冇set都有咁好效果
早兩個月又電髮又染髮,搞到啲頭髮好殘,夜晚洗完頭第二朝起身個頭鬆開晒成舊棉花糖咁,又唔鬈,濕水再gel頭都搞唔掂,有時嬲嬲哋扎起佢算數,但明明電到個頭咁靚,冇理由搞到自己成個師奶咁出街架,一定要諗吓辦法!

試用咗Fanitsu嘅活髮修護水療髮膜,好有驚喜!以前短頭髮時咩都懶得做,覺得焗油好麻煩,但頭髮長咗又電過點都要護理吓,就即管試啦,原來都好簡單,洗完頭將髮膜捽勻頭髮,用個浴帽笠住幾分鐘再沖水就得,頭髮即時變得好滑,冇晒打結,最正係乾咗之後啲頭髮超有彈性,電咗啲鬈紋完全出番晒嚟,同埋唔會成隻鬆毛狗咁,唔gel頭都完全冇問題!依家我keep住一星期用兩三次,特別係要扮靚靚出街見人嗰日一定喺朝早起身焗一次,由得頭髮自然乾就已經好靚,乜都唔駛搞,其實仲方便過慢慢gel頭吹頭。




Fanitsu 活髮修護水療髮膜
$198 from 愛美麗網